Tura-o Intensified Mission Indradhanush-ko a·bachengata

TURA: Sombar salo, West Garo Hills a·jani Deputy Commissioner Ram Singh, Intensified Mission Indradhanush 4.0-ko Tura-ni Chitoktak Community Hall-o a·bachengate on·aha aro iako a·bachengatani somoio Additional DM&HO, District Immunization Officer, gipin health official-rang, Anganwadi worker-rang aro jolni dilgiparangba dongpae bak ra·angaha.
Ia Intensified Mission Indradhanush 4.0-ko a·bachengate on·angani somoio West Garo Hills a·jani Deputy Commissioner, jinmana aganprakangengon, tikarangko su·e ra·anichisan ma·giparang aro bi·sarang sabisi sakanchirangoni naljoke dongna man·gen ine parakangenba, detangtangko tika su·e ra·china gita ma·a paarangko didiskachina ua dingtang dingtang dolrangko didiangaha.
Dedrangrangna an·seng baljokaniko on·aniara ma·giparangni daitosan ong·ja ine talataniko on·angengon, detangtangna an·seng baljokaniko on·anio pagiparangkoba ma·giparangna dakchakanirangko on·china DC didiangaha.
Detangtangni an·seng baljokanina aro bi·sarangna tikarangko on·na nangani giminba ua aganangaha.
Ia tom·anio District Immunization Officer (DIO) Dr Ivonne M Sangma-ba dongpae jinmana aganprakangengon, Intensified Mission Indradhanush-ni miksongani aro niamrangni gimin talate on·angenba atchidaldaloni bilsi 2 ong·gipa sak 1402 bi·sarangna aro sak 295 an·o donggipa me·chikrangna chang 176 session-ko ong·atanio tika su·aniko matchotatna gita West Garo Hills a·jao ia brigipa tika su·aniko dakenga ine parakangaha.
Ia bilsio Meghalaya a·dok gimiko West Garo Hills a·jako man·chape gimik damgittam a·jarangkosan Intensified Mission Indradhanush-na seokaha ine janapatengon, ia cholko man·engani gimin Health department baksa bakrime detangtangna tikarangko su·e ra·rikchina gita Dr Sangma didiangaha.
Ia tom·anio dongpae jinmana aganprakanggipa gipin manderangara, Additional DM &HO Dr Bijoy Debbarma, DEMO M Marak aro gipinrang ong·a.