TURA: Mongolbar salo, Tura-ni Field Outreach Bureau-ni gita, Azadi Ka Amrit Mahotsav, Janjatiya Gaurav Diwas aro COVID-19-ko warachakna namgipa dakbewalrangni bidingo agan-talate on·na gita Integrated Communication & Outreach program baksana Exhibition-ko West Garo Hills a·jani Walbakgre LP School-o ong·atangaha.
Ia program-ko ong·atanio Walbakgre LP School-ni headmaster Dipak Sangma, Azadi Ka Amrit Mahotsav-ni gimin agan-talate on·angengon, British-rangni sasoniko jakgitel ong·atna gita Pa Togan Nengminja Sangma-ni ka·dongbee warachakani gimin gisik ra·atpilaniko dakangenba, uni a·songtangna on·kanganiko pangnan gisik ra·china gita chatro chatrirangko didiangaha.
Ia program-o Tura-ni Senior Medical & Health Officer Dr Gandira Ch Marak, COVID-ko warachakna namgipa dakbewalrangni gimin talate on·angskaengon, mask-rangko ganjringanichi, jakrangko jaksujringanichi aro saksa sakgipinoni chel·tanggrike donganichi ia COVID-19-oni naljoke dongchina tom·anio bak ra·giparangko didiangaha. Bilsi 15 batgimin manderang pilakkon tika su·e ra·china gitaba ua didiangaha.
Ia program-ko ong·atani bak gita quiz competition aro exhibition-ko ong·atangan baksana COVID-19-ni niamrang aro tika su·ani gimin segipa lekka bichit aro poster-rangkoba suale on·angaha.
