Sak 5 Cong MLA-rang dal·en gualaniko dakaha: PN Syiem

SHILLONG: A·dok Congress aro AICC-ni namnika ba namnikgijaniko mamingkoba sing·cheng sanchenggija, sakbonga Congress MLA-rangni, Meghalayao NPP-ni rikdilenggipa MDA sorkarina chakpaaniko on·na ku·rachakaniko Meghalaya Pradesh Congress Committee (MPCC) namen suk ong·gijaniko parakaha.
“Ia party MLA-rangni daka namen gualani ong·aha.  nangrime rikenggipa MDA sorkario BJP-ba donga ine an·ching ma·sina nanga. Congress Legislature Party (CLP), jedakgipa sorkarinaba chakpaaniko on·bo, indiba pilakna skang AICC aro MPCC baksade agangrikchengna nanga” ine sakbonga MLA-rangni, MDA sorkarina chakpaaniko on·na ku·chakani gimin MPCC working president, Pynshngain N. Syiem suk ong·gijaniko aganaha.
MPCC iani bidingoru·utgijan tom·e chanchigen ineba ua aganaha.
“Je sorkarion BJP-ni bakrimani gnang, ua sorkari baksade bak ong·pana man·ja ine an·ching iako namen ma·siaha. Congress, maidake BJP baksa kam ka·rimna man·gen ine manderangni dal·bea sing·ani nakatgnok,” Syiem aganaha.
Uni aganani gitade, BJP gita dakgipa non-secular ba secular ong·gijagipa dol baksa Congress mamingsaloba kam ka·rimna man·jawa.
MPCC working president indakeba aganaha je AICC-ni ra·chakaniko man·gipa dolsa chu·gimik bil man·gipa MPCC-ko songgen.
“Ia a·selrangko chinga namen dal·e ra·enga” ine Syiem agandapaha.