SHILLONG: Meghalaya a·doko Congress dolni sakbonga MLA-rangba National People’s Party (NPP)-chi dilenggipa Meghalaya Democratic Alliance (MDA) sorkario bakrimaniko on·na re·baahani gimin Congress baksa nangrime kam ka·anio maming neng·nikani dongjawa ine a·doko sakgni BJP MLA-rangoni saksa Sanbor Shullai parakataha.
BJP, Congress, HSPDP pilakan ramram political dolrangsan ong·aia ine janapatengon, a·dokna nangrime kam ka·anisa mongsongbatgipade ong·aia ine South Shillong-ni BJP MLA parakataha.
Mongolbar salosan, Congress dolni MDA-o bakrimna re·baanina BJP-ni state president Ernest Mawrie-de suk ong·gijaniko parakatahachim aro Congress MLA-rangni MDA-o bakrimaniko on·aniara namen aiao inmanani ong·a ine aganahachim.
Meghalaya a·doko bangki dongkuenggipa sakbonga Congress MLA-rang, Mongolbar salo, a·dokni Chief Minister Conrad K Sangma-ko grongenba, MDA-o bakrimna kusi ong·aniko parakeaha aro iani bidingo All India Congress Committee (AICC) aro Meghalaya Pradesh Congress Committee (MPCC)-ni dilgiparangba suk ong·gijaniko parakskaahachim.
NPP-chi dilenggipa MDA sorkario BJP-ba bak ong·paengani gimin Congress MLA-rangni MDA-o bakrimanina AICC-ni dilgiparang suk ong·skajaengachim.
Da·o dipet India a·song gimikon Congress aro BJP dolni gisepo bakrime kam ka·ani dongkujachim aro ia dolgnini bakrimani da·o Meghalaya a·dokon skanggipa ong·ahachim.
Meghalaya a·doko a·dokni gitcham Chief Minister Mukul Sangma-ni dilanichi Congress dolni sak 12 MLA-rang, Congress-ko wate All India Trinamool Congress (AITC)-o napangskaani ja·man Congress dolo sakbonga MLA-rangsan dongaiahachim.
