TURA: Garo Hills Autonomous District Council (GHADC)-na Royalty Share-oni gong kror 20 tangkarangko Meghalaya sorkari, on·sochengna manchiaha ine kobor on·aha.
Mining & Geology department-ni Under Secretary FR Marak-ni u·iatani gitade, ia tangkarangko Finance (EC-I) Department-ni Contingency Fund-oniko GHADC-ni dingtang dingtang kamrangna jakkalsochengna gita a·dok sorkari chamataha.
GHADC-o kam ka·enggiparang baditaba jarangni dormaharangko man·tokkujaengani gimin ia February jani gisepon jabrini dormaharangko on·na jotton ka·gen ine adita salrangna skangsan, GHADC-ni gital chief executive member (CEM) Rakesh A Sangma ku·rachakaniko on·angahachim ine nikna man·a.
GHADC-o kam ka·enggiparangni dormaharangko on·na ku·rachakgiminko chu·sokatna man·jagenchimode kamtangko watna nanga ine mitam dolrang dabiskaengachim ineba nikna man·a.
GHADC-ni gital CEM Rakesh Sangma-ko ra·galpilchina dabie GSU, AYWO, ADE, FAF, FKJGP aro NESO dolrang, re·anggipa Mongolbar walonin night road blockade-ko ong·atskaengachim.
