GHADC-ni gital CEM-ko jegale Feb 14 tariko jinma tom·aniko ong·atenga

 

TURA: Garo Hills Autonomous District Council (GHADC)-ni gital chief executive member (CEM) Rakesh Sangma-ko ra·galpilchina dabie, re·baenggipa February 14 tariko Garo Hills gimikni NGO-rang, GHADC office mikkango jinma tom·bimonganiko ong·atenga ine kobor on·aha.

Bristibar salo, GSU, ADE, AYWO, FAF, FKJGP aro NESO dolrangni dilanichi GHADC office sambao jinma tom·aniko ong·atangenba, re·baenggipa February 14 tariko GHADC-ni gital CEM-ko jegalna gita jinma tom·bimonganiko ong·atna tik ka·angaha.

NGO-rangni parakatani gitade, jinma tom·bimonganiko ong·atna gita district administration, permission-ko on·jagenchimoba, a·songni dongimin bilo pangchake NGO-rang, jinma tom·bimonganiko ong·atangaigen.

GHADC-ni gital CEM Rakesh Sangma-ko ra·galchina ba ua an·tangan kamtangko wate on·china dabie, Garo Hills-ni dingtang dingtang NGO-rang, re·anggipa February 1 tarikonin dingtang dingtang dake jingjengatna a·bachengahachim ine nikna man·a.

NGO-rangni jegale jingjengatanio February 1 aro 2 tarikrango salgnina GHADC-o kam ka·giparangni ‘pen down strike’-ko, February-ni 3 aro 4 tarikrango salgnina non-cooperation movement (NCM)-ko ong·ate, re·anggipa February 8 tarikoni 11 tarikona night road blockade ba walni somoio rama champengataniko dakengachim ine nikna man·a.

Indake ong·genchimoba, da·onan GHADC-ni gital CEM-ko ra·galani bidingo maming aganchakanirangko man·kujaengani gimin NGO-rang, re·baenggipa February 14 tariko jinma tom·bimonganiko GHADC office mikkangon ong·atna manchiangskaaha.

Get real time updates directly on your device, subscribe now.

Comments are closed.