GUWAHATI: South Garo Hills a·jani Gasuapara gita niam gri Bangladesh a·songona koela watanio jak donggipa Balwan Bhama-ko gipin sakbri manderang baksa, re·anggipa February-ni 9 tariko, kajina gamchipgija dongani gimin Assam-ni police-rang, Guwahati songjinmani Basistha joloniko rim·aha.
Bhama aro gipin sakbri manderang, gong kror 40 tangkarangko ra·e kataha ine Assam-ni Taxation department, FIR ka·doangani ja·man Assam-ni police-rang, ia koela badinggipa manderangko rim·aha.
Koborko on·ani gitade, batanggimin jaosan, rim·ako man·gipa Balwan Bhama, Jeep, Fortuner aro koela bikotani dal·dalgipa garirangko breahachim.
Indake ong·engon, da·o re·baenggipa salrangoba gipin manderangko rim·dapangkunaba gnang ine Assam police-rang u·iataha.
Meghalaya a·doko koelarangko bikote salruraengoba e-way bill-rangkode Bhama-ni company-ni bimingosa Assam-o tariskaengachim ine kobor on·aha.
Meghalaya a·doko niam gri koelarangko badingenga aro koelani kajinarangko ra·e katenga ine changni chang matnanganirangko man·engoba da·onan a·dok sorkari, iani bidingo inquiry-ko dakchina ge·eta dongkujaengachim.
Adita salrangna skangsan, AITC-ni dilgipa Mukul Sangma-ba South Garo Hills a·jani koela a·damrangona re·ange am·sandienba niam gri koela badingengani gimin sorkarina u·iatahachim aro iani bidingo jakgitele am·sandianirangko dakchina a·dokni chief secretary-ko didigen ine parakatahachim.
Rim·ako man·gipa Bhama-ni company-an re·anggipa December ja a·bachengonin Gasuapara gita Bangladesh a·songona koela salna gita e-way bill-ko jakkalengachim aro iako a·dok sorkarian on·skaengachim.
Ia koelarangko Assam-onikosa Dainadubi gita salangenga ine a·kangengoba kakketode ia koelarangara South Garo Hills a·jani Jadigittim aro uandakgipa koela a·damrangonisa ong·achim aro ia koelarangko Gasuapara gitan Assam-ni e-way bill-rangko jakkale Bangladesh-ona watatskaengachim.