Politics-ni gita didianiko man·esa jegalenga ine CM-ni agananiko NGO-rang jegala

 

TURA: Politics-ni gita didianiko man·esa Garo Hills Autonomous District Council (GHADC)-ni gital chief executive member (CEM)-ko jegaltokenga ine Sombar salo Chief Minister Conrad Sangma-ni agananiko, jegalenggipa dolrang jegalatenba, uni iandake agananiara bi·sani chanchie aganani aro chanchininggija aganani gitasa ong·aha ine parakataha.

GHADC-ni gital CEM-ko ra·galchina dabianiara politics-ni gita didianiko man·e jegalanisan ong·aia aro district council-o seokako man·gipa member-de Tribal ong·genchimoba ong·jagenchimoba council-ni CEM ong·na man·aia ine Sombar salo a·dokni Chief Minister parakatahachim.

Indake ong·engon, chief minister-ni iandakgipa kattarangko aganahani gimin NGO-rang suk ong·gijaniko parakatenba, uni agangipa kattarangara chanchininggija aganani gitasa ong·aha ine parakatskaaha.

“Seokako man·gipa je member-ba, A·chikrangni bewalko ja·rikgijagipaba GHADC-ni CEM ong·na man·aia ine chief minister aganaha. Ian namen kragijani aro ra·chakna man·gijagipa kattarang ong·aha. Ua iandake chanchienga ong·ode chinga uo mingsako sing·skagen….Zikzak-ni MDC Aktar Ali-koba ua GHADC-ni CEM ong·na on·aigenma?” ine FKJGP Garo Hills Zone-ni president Pritam Marak sing·doangaha.

Politics-ni gita didianiko man·esa NGO-rang jegalenga ine agananiko jegalatskaengon, ian bi·sarangni chanchianiko aganani gitasa aro namen chanchininggijagipa kattarangsa ong·aha ine NGO-rang parakataha.

“Chief minister-ni iandake agananiara A·chikrangni ma·sianiko sing·doani gitasa ong·enga maina Rakesh-ni CEM ong·aniko NGO-rangsan jegalenga ong·ja indiba Garo Hills-o songdongenggipa A·chik sakantian jegalenga,” ine FKJGP-GHZ-ni president parakataha.

Chief minister-ni agangipa kattarangko GSU-ni president Tengsak Momin-ba jegalatengon, GHADC-o ong·enggipa obostako on·na on·enga ong·ode gipin district council-rangoba apsankon ja·rikpaani cholrang donga ine parakataha.

“Da·alo Rakesh GHADC-ni CEM ong·na man·enga ong·ode knalo Aktar Ali-ba CEM ong·na man·aigen. Ian namen kenchaksona nangenggipa obosta ong·enga. A·dokni chief minister, Rakesh-ko CEM ong·china nangnikengode, Meghalaya a·dokni ADC-rangko chalaianio namen neng·nikani ong·gnok. Da·alo GHADC-o ong·enggipa apsan obosta KHADC aro JHADC-oba ong·na man·aigen. Uni gimin chinga manderangni nangnikaniko knachakchina da·alo chief minister-ko didienga aro Rakesh-ko CEM ong·aoniko ra·galatchina aganenga. Ia jingjengatanio hajalni hajal manderang ching baksa ong·enga,” ine Momin parakataha.

CEM Rakesh-ko jegalaniara NGO-rangni jegalanisan ong·ja indiba A·chik jat gimikni jegalanian ong·enga aro uko CEM ong·aoniko ra·galkujaskal jingjengataniko dontongjawa ine ADE-ni president Dalseng Bira Ch Momin-ba parakataha.

Rakesh-ko GHADC-ni CEM-na seokanio ua maming bak dongja ine Chief minister-ni agananiko AYWO-ni president Sengbath Marak jegalatskaaha aro ua an·tangan NPP-ni national president ong·e ia kamrangko nirokna bil donga ine parakataha.

Get real time updates directly on your device, subscribe now.

Comments are closed.