Garo Hills-ni MLA sakgni BJP-o napna miksongenga ine BJP state prez a·kanga

 

SHILLONG: Re·baenggipa 2023 bilsini Meghalaya Legislative Assembly election-na pilak dolrangan tarisamsotokengahaon, Garo Hills-ni MLA sakgni Bharatiya Janata Party (BJP)-o napna miksonganirang dongenga ine Robibar salo, BJP-ni state president Ernest Mawrie parakataha.

Mawrie-ni parakatani gitade, adita salrangna skang ua Garo Hills-ona re·bae agangrikon, MLA sakgniba BJP-o napna skaniko una parakattokaha.

“Chingni dolo napna sikenggipa mitam MLA-rang aro gitcham MLA-rangko grongna gita anga Garo Hills-ona re·angaha. Gitcham MLA-rangoni Bluebell Sangma (Chokpot) aro Edmund K Sangma (Dadenggre)-de ching baksa bakrimeaha aro anga BJP-ona re·bana nangnikenggipa MLA sakgnikoba gronge agangrikbaaha,” ine BJP-ni state president parakataha.

BJP-o napna miksongenggipa MLA sakgnini bimingrangko ua parakatjahaoba July jaon uamangni gimin pilakan ma·sina man·aignok ine Mawrie parakataha.

Mawrie-ni parakatani gitade, BJP-o napangenggipa MLA-rang aro gitcham MLA-rangna agreba 2018 bilsini Assembly election-o susagipa candidate-rangba BJP-o napangengaha.

“Garo Hills-o chinga bilakbaroroengaha aro ia chang election-ode chinga name dakna ka·dongenga,” ine ua aganaha.

Khasi aro Jaintia Hills jolrangni gimin janapatskaengon, Jaintia Hills-ni gitcham MLA saksaba BJP-o nape 2023 bilsini election-o susana nangnikenga indiba Khasi Hills-osa da·o dipet MLA ong·enggiparangoni saksa sakgni BJP-o napna skanirangko parakahaoba uamangni gimin name ma·sina man·kujaenga ine BJP-ni state president parakataha.

Get real time updates directly on your device, subscribe now.

Comments are closed.