TURA: Garo Hills Autonomous District Council (GHADC)-o ong·enggipa obostani bidingo Dalbot Maharini bimingko ra·e Facebook social media-o mitam manderangni seatahani gimin All Dalbot Mahari Association (ADMA) talataniko on·angaha.
“Mitam manderang Dalbot Maharini bimingo social media-ko, chong·motan FB post-ko jakkale GHADC-ni golmalni gimin an·tangtangni chanchianirangko watenga ine ADMA nikaha. Uni gimin iano indake talatenga, je All Dalbot Mahari Association (ADMA)-ara official association-sa ong·a, jekon Maharini nanganirangsan jakkala aro politics-o bak ra·gipa dol ba association ong·ja. Social media-o watgiparang an·tangtangni chanchianikosan watenga aro All Dalbot Mahari Association iano maming bak dongja,” ine ADMA-ni general secretary John SD Shira parakataha.