SHILLONG: Meghalaya a·doko Khasi-Jaintia Hills a·jarangosan ong·aigija Garo Hills-oba bang·a dilgiparangan da·o United Democratic Party (UDP)-o napna sienggiparang dongengahani gimin re·baenggipa 2023 bilsini Assembly election-ode Garo Hills-oba UDP-ni bang·bata candidate-rang susagnok ine UDP-ni dilgiparang parakataha.
UDP-ni president Metbah Lyngdoh-ni parakatani gitade, re·anggipa bilsini bon·angachibara damgittam Assembly constituency-rango ong·atanggipa by-election-o UDP name dakna man·ahani gimin aro MDC saksaba UDP-o napangahani gimin da·o a·dokni bang·bata biaprangon dilgiparang, UDP-o napna sikgiparang dongengahachim.
“Kakketko agangenchimode Khasi-Jaintia Hills-osan ong·aigija Garo Hills-oba da·o MDC saksa dongahani gimin seokako man·gipa dilgiparangoni mitamrangde ching baksa bakrimna skaniko paraktokengaha,” ine Lyngdoh parakataha.
Skangode Garo Hills-o UDP-ni MLA ba MDC-rang dongkujani giminsa uamang senge dongengachim indiba da·ode Garo Hills-oba UDP-o MDC saksa dongahani gimin da·o Assembly election-ode UDP, bang·bata biaprangon susana man·gnok ineba UDP-ni president parakataha.
“Uni gimin da·o re·baenggipa bilsini election-ode chinga Garo Hills-o bang·bate candidate-rangko susaatgnok indiba da·o dipet chinga badita sak candidate-rangko susaatgen, chanchia dongkuja,” ine ua aganaha.
UDP-o baditaba sak dilgiparangde napmanaha aro uamang somoi ong·ahaon uamangni bimingrangko jinmana parakatgnok ineba UDP-ni president aganaha.
Re·baenggipa election-o nanga gita seat-rangko chee sorkariko rikna man·genma ine sing·on, “Chinga dolni gita iana raken kamko ka·enga aro pilakan an·tangtangko on·kange kam ka·enga. Da·o dipet chingni chadambe dolba kamrangko ka·na a·bachengengaha aro uamang an·tangtangan obostarangko nie kamko ka·engaha,” ine Lyngdoh parakataha.
