St Paul’s Seminary School-ni Diamond Jubilee-ko mania

SHILLONG: Mongolbar salo, St Paul’s Seminary School-ni Diamond jubilee-ko Upper Shillong-o donggipa skul campus-o maniangaha aro ia manianio a·dokni Chief Minister Conrad K Sangma-ba dongpae bak ra·angaha.
Ia skulni diamond jubilee-ko manianio Chief Minister baksana Shillong-ni Archbishop Victor Lyngdoh, a·dokni C&RD Minister Hamletson Dohling, Urban Affairs Minister Dasakhiatbha Lamare, Mylliem block-ni BDO PT Passah, skulni skigiparang, chatro chatrirang aro gipinrangba dongpae bak ra·angaha.
Ia manianio a·dokni Chief Minister, jinmana aganprakangengon, chatro chatrirangko mande ong·atna tariengani gimin skulni dilgiparangko aro skigiparangko mittelpilangenba, Catholic skulrangan a·gilsakni seng·aniko on·anio mongsonggipa kamko ka·enggiparang gita ong·a ine parakangaha.
“An·ching pilakkon miksongani gnangsa Nokgipa Isol a·gilsakona watataha aro ia miksonganiko chu·sokataniara an·ching sakantini daitoan ong·a. Isolni miksonganiko chu·sokatanio iandakgipa skulrangan an·chingna dakchake on·giparang gita ong·skaa,” ine Sangma aganaha.
An·tangni pagipa sagi Purno A Sangma-ni janggi tangani gimin aganangengon, ukoba Catholic Mondolini father-rangsa Isolni nangnikani gita tarie mande ong·ataha aro iani a·selsa uamangba da·o iandakgipa gadangona sokpaaha ine Chief Minister parakataha.
Namgipa gunrang baksa a·gilsakni seng·aniko skie ra·china gitaba ua skulo poraienggipa chatro chatrirangko didiangaha.

Get real time updates directly on your device, subscribe now.

Comments are closed.