SHILLONG: Meghalaya a·doko Congress dolni sakbonga MLA-rang BJP-o napna kusi ong·genchimode MLA-rangko nokchakna kusi ong·aigen ine Budbar salo, BJP-ni state president Ernest Mawrie parakataha.
“BJP-ni mongsonggipa miksonganian India a·songko Congress-oni jakgitel ong·atanisa ong·engani gimin a·doko Congress dolni sakbonga MLA-rang chingni dolo napna sikgenchimode chinga uamangko nokchakna kusi ong·begen,” ine Budbar salo Mawrie, kobor ra·timgiparangna parakataha.
Da·o ong·enggipa MLA aro MDC-rangoniba BJP-o napna skanirangko u·iatgiparang donga ine janapatengon, uamang BJP-o napna skanirang donggenchimode BJP-ni miksongani aro bebera·aniko ra·chakchengna nanggen ineba BJP-ni state president parakataha.
“Chingni mongsonggipa miksonganian manderangna rongtalgipa aro maming tangka paisa jakkalsreta grigipa sorkariko on·anisa ong·a. Uni gimin je dilgiparangan chingni dolo napna skanirang donggenchim, a·songni Prime Minister Narendra Modi gita dakgipa dilgiparangko ra·chakna nanggen,” ine Mawrie aganaha.
Congress dolni MLA-rangko NPP-chi dilenggipa MDA sorkario rimnapna skang, a·dokni Chief Minister Conrad Sangma, BJP-ni dilgiparangna u·iatchengna nangachim ineba Mawrie aganaha.
Comments are closed.