SHILLONG: Re·baenggipa March-ni 9 tariko Assam aro Meghalaya a·dokni Chief Minister-rang, Union Home Minister Amit Shah baksa Delhi-o tom·e chanchirimna siengani gimin a·dok damgnini simarango meligrikna man·jaenggipa biaprangoni damdok jolrangkode namatna man·gnok ine Meghalaya sorkari ka·dongenga.
“Angko aro Assam-ni chief minister-ko Delhi-ona re·angchina okamataha aro ua salo Union Home Minister, chingna maiko agangen, unosa kamrangde pangchakaignok,” ine Bristibar salo, a·dokni Chief Minister Conrad Sangma aganaha.
Union Home Minister-ko gronganio a·dok damgnini tarie on·gimin report-rangni giminsa chanchirimnaba gnang ine janapatengon, “Anga bebera·a ia tom·anio chinga bon·kame chanchirimna man·gnok aro ia damdok biaprangni giminde tik ka·e matchotatna man·gnok,” ine Sangma parakataha.
Indake ong·genchimoba, ua salo Union Home Minister baksa tom·e chanchirimaniosa mai ong·a ukode ma·sina man·aigen ineba Chief Minister aganaha.
Adita antirangna skangsan, Assam aro Meghalaya a·dok damgnian a·dok damgnini tarigimin report-rangko Home Ministry-na on·eahachim ine nikna man·a.
