Chandmary field-ko semikmike nosto ka·anina AHAM-ko jegalgrima

TURA: Tura Chandmary-o gital tarigipa robol kal·chakaniko Sonibar walo, A·chik Holistic Awakening Movement (AHAM) dolni manderang, ma·manti kattarangko see nosto ka·ahani gimin bang·a manderangan suk ong·gijaniko parakattokaha.
Tura-ko Winter Capital dakchina dabie AHAM-ni manderang, ia Chandmary field-o ma·manti kattarangko see donangaha aro ian manderangni nikanio nitogijanisan ong·aigija namroro silroroaniko champengani gitaba ong·engachim.
Iani bidingo West Garo Hills District Administration-ni gita facebook-o jegalatengon, iandake manderangni gam-jinko nisie galaniara Defacement of Public Property Act 1985 aro Public Nuisance Act-ni ning·o sastirangko man·na kraa ine parakatenba, ia biapko nosto ka·anina AHAM-ni kosako nanga gita ja·kurangko de·china ge·etangaha.
Chandmary field-ko taridapenba, adita salrangna skangsan ia robol kal·chakramko a·dokni Chief Minister Conrad Sangma, oprake on·angahachim ine nikna man·a.
Ia biapo AHAM-ni semikmike donanggipa noksarangko social media-rango watpripraatani ja·man bang·a manderangan suk ong·gijaniko parakattokaha aro AHAM dolni kosako rakgipa ja·kurangko de·china didiattokaha.
“Ian skia man·gijaniko mesokanisan ong·aia. Uamang sorkario maikoba dabienga ong·ode nama bewalo dabina man·achim indiba iandake manderangni namgnina tarie on·gipa gam-jinrangko nosto ka·e galaniara gisik gri ong·aniko mesokani gitasa ong·aha,” ine mande saksa social media-o parakataha.
Koborko on·ani gitade, ia biapo semikmike donangan baksana ia biapo tarie dongipa light-rangkoba AHAM-ni manderang nosto ka·e galangaha.