SHILLONG: Meghalaya a·dokoba Bharatiya Janata Party (BJP) bilakbaroroengaha ine a·dokni BJP-ko dilgiparang parakatenba, re·baenggipa 2023 bilsini Assembly election-ode Garo Hills-mangmangon komibeoba damchet seat-rangko chena ka·dongenga ine parakataha.
BJP-ni state vice president aro Tura-ni MDC Bernard N Marak-ni parakatani gitade, 2023 bilsini Assembly election-na skangan uamang BJP-ko bilakbatatna jotton ka·enga aro election-o dingtang dingtang political dolrangni bilake dongenggipa constituency-rangko ra·rikskana jotton ka·enga.
“Pilak dolrangon an·tangtangni dilgiparang aro kam ka·ani bewalrang donga aro chinga BJP dolde, tangka jakkalsretaniko bon·atna kam ka·enga. Gipin dolrangni giminde chinga ma·sija indiba chinga gipin dolrangni ra·e dongenggipa biaprango chena ka·dongenga,” ine Marak, Garo Hills-o All India Trinamool Congress (AITC), Indian National Congress (INC) aro National People’s Party (NPP) dolrang baksa susagrikani bidingo sing·anina aganchakaha.
Meghalaya a·doko aro mongsongbate Garo Hills-o BJP-ko bilakbatatna uamang krengenga aro da·ororo a·brirango songdongenggipa manderangba BJP-ko ra·chakengahani gimin uamangni kamrang chu·sokgipa ong·enga ineba BJP-ni state vice president parakataha.
AITC-ni gimin janapatengon, party-ko ra·chakanide manderangko ra·chakna man·aniosa pangchakbatani gimin ian manderangni jakosa ong·aia ine Marak parakataha.
BJP dolni mongsonggipa miksonganian a·doko tangka jakkalsretaniko bon·atanisa ong·engani gimin re·baenggipa 2023 bilsini Assembly election-o ia kamchi BJP chu·sokgipa ong·gen ineba Marak parakataha.
Ia sal somoirango manderang, campaign ka·anirango agananirangnade nachil songjaha indiba kamrangko niesa dilgiparangko seokengaha ineba Marak parakataha.