SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·ote galgipani bidingo Justice T Vaiphei-ni inquiry commission, re·baenggipa March-ni 11 aro 12 tarikrango hearing-ko ong·attaina sienga ine kobor on·aha.
Iana skangba ia a·selni bidingo inquiry commission, chang 14-na kingking hearing-ko dakangahachim aro uandaken da·o March-ni 11 aro 12 tarikode chang 15 gapgnokchim.
Official saksani kobor ra·timgiparangna u·iatani gitade, ia a·selni bidingo inquiry commission, August-ni 13 tariko Shillong songjinmani Kynton Massar-ona police-rangko dilanggipa East Jaintia Hills a·jani SP Jagpal Singh Dhanoa-ko man·chape sorkarini gimik sakbonga official-rangko sing·sandiaha.
Da·o changgipin hearing-ko ong·ataniode, so·ota man·gipa mandeni ma·drangrangko inquiry commission, sing·sandiangskana sienga ineba official parakataha.
Inquiry-ko dakdilenggipa Justice Vaiphei, ukilrang aro police official-rang, a·sel ong·chakgipa biapona re·ange Thangkhiew-ni nokdangkoba grongemanahachim.
Indake ong·engon, ia inquiry commission-ni report-ko jagittamni gisepon a·dok sorkarina on·atnaba dongaha ine official saksa parakataha.
Ia inquiry-ko matchotna gita a·dok sorkari, re·anggipa February 20 tariko jagittam somoiko commission-na on·dapahachim.
Re·anggipa 2021 bilsini August 13 tariko HNLC-ni gitcham dilgipako police-rangni so·ote galani ja·man Shillong songjinmao ding·chaoanirang ong·katahani gimin ia a·selni bidingo judicial inquiry-ko dakchina Meghalaya sorkari ge·etangahachim.
