Assam-M’laya-ni simao golmal ong·enggipa damdokkode bakan namatna man·gnok ine CM a·kanga

 

SHILLONG: Assam aro Meghalaya a·dokni chief minister-rangko re·baenggipa March-ni 9 tariko apsan asonge agangriktaina gita Union Home Minister Amit Shah okamatengani gimin, a·dok damgnini gisepo golmal ong·enggipa biaprangoni damdok jolrangkode ta·raken namatna man·gnok ine Sombar salo, Meghalaya a·dokni Chief Minister Conrad K Sangma, an·tangni ka·dongsoenganiko parakataha.

Assam-Meghalaya simarango ong·enggipa obostarangni gimin Assembly-o aganprakangengon, a·dok damggnini chief minister-rangko Union Home Minister Amit Shah okamataha aro uamang March-ni 9 tariko bon·kame agangrikna siengani gimin ia salon golmal ong·enggipa damdok jolrangkode namatna ka·dongengaha ine Chief Minister parakataha.

“A·dok damgnini Memorandum of Understanding (MoU)-o soi ka·grikani gitade, chinga da·o mikkangchi a·dok damgnini simarango golmal ong·enggipa dam 12 biaprangna agrede golmal ong·enggipa gipin biaprangkode ra·dapjawaha,” ine Sangma aganaha.

A·dok damgnini simarango golmal ong·enggipa dam 12 biaprangoni skanggipa bako a·dok damgnini namatchengna kam ka·enggipa damdok jolrangara, Tarabari (4.69 sq km), Gizang (13.53 sq km), Hahim (3.51 sq km), Boklapara (1.57 sq km), Khanapara-Pillangkata  (2.29 sq km) aro Ratacherra (11.20 sq km) ong·engachim.

2011 bilsio Meghalaya a·dokni a·kanggimin dam 36 songrangoni dam 30-kode Meghalaya a·dok ning·on ong·china gita a·dok damgni songgrike ku·pattianiko on·aha ineba Chief Minister parakataha.

Chief Minister-ni parakatani gitade, Meghalaya a·doko ong·na sienggipa biaprangara, West Khasi Hills a·jao Tarabari jolni dam 8 songrang, Gizang jolo donggipa damgittam songrangoni damgni, Hahim jolo donggipa dam 12 songrangoni Dam 11, Ri Bhoi a·jao Boklapara jolo donggipa damgni songrangoni damsa, Khanapara-Pillangkata jolo donggipa dam 6 songrangoni dam 5 aro East Jaintia Hills a·jani Ratacherra jolo donggipa dam 5 songrangoni dam 3 ong·gen.

Ia damdok jolrangni bidingo a·dok damgnian apsan asonge chanchirimanichi aro dingtangmanchagipa kolrangko jakkale ia songgigrikaniko dakaha ine janapatengon, ia biaprangko a·dok damgnini official-rangni mikkango Survey of India-ni gita toe nigenchimosa talbate ma·sina man·gen ine Chief Minister parakataha.

Ia songrang je a·dokchi re·anggenchimoba a·nokgiparangnade maming nangchakeani dongjawa ineba Chief Minister talataniko on·angaha.