SHILLONG: Assam-Meghalaya meligrikgijagipa sima-arirangoni dingtang dingtang dam 12 biaprangoni dam dokko bon·kame tik ka·grikna a·dok damgnini skotong minister-rang Union Home Minister Amit Shah-ko grongna manchigimin salko March 15-ona dontongataha.
Ua mija Mongolbar-o Union Home Minister baksa ku·silitingo chanchigrikani salko March 15-ona donatna man·ode ine ua mol·mola gnang golpoataha ine aganaha.
Changrikani salo sima-ari golmalni bidingo che·em che·em chanchina uamang nangnikenga aro agangrike ua miksonganiko donaha indiba Union Minister uni choljoka salko ra·e meeting-ko ra·doaha, chief minister aganaha.
“Uni gimin uni choljokani salko chingna u·iataniko chinga senggen. Angni ka·dongsoani ia March jani gisepon ong·genkon, chinga March 15 ba March 18 ba je tarikoba ong·china chinga chanchigrikgen, Home Ministry, Assam-ni Chief Minister aro angni choljokaosa ong·aignok uni gimin bon·kamgipa salna chinga sengaiengjok,” ua agandapaha.
Assam aro Meghalaya a·dok damgnini chief minister-rang mijal Butbar salo Union Home Minister-ko grongani ong·achim aro bon·kamgipa chanchiani ong·angkuna ka·dongsoenga.
Assam aro Meghalaya-ni chief minister-rang a·dok damgnini gisepo sima-ari golmalko namatna jotton ka·e January jaon memorandum of understanding soi ka·aha.
