SHILLONG: Meghalaya Sorkari, 2019-2022 bilsini gisepo Gong 754,06,43,565 kajinarangko a·dokni mongsonggipa a·ningni gamrangoniko man·aha.
Iarangni bidingo Assembly-ni question hour-o parakatengon, mongsonggipa a·ningni gamrangoni man·gipa kajinarangoniko, mongsongbate koelani kajinaoni 75 percent-ko sorkari man·enga aro 25 percent-de Autonomous District Council-tangtangni ong·enga, indake 2019-2020, 2020-2021 aro 2021-2022 bilsirango ADC-rangni man·rikgipa kajinara Gong kror 174,63,77,654 ong·a ine Cabinet Minister Sniawbhalang Dhar aganaha.
Ua indakeba agankua je, kajina man·giminrangoniko ge·gittam ADC-rangna Gong 209,39,36,458 tangkarangko watataha aro da·o Gong 21,01,25,236 watatna nanggipa tangkarang dongkuenga.
Uni taldapatani gitade, KHADC-na kror 2 bangki dongkuenga aro JHADC-na kror 18.18 bangki dongenga, unomitingo Garo Hills Autonomous District Council (GHADC)-nade kror 55-ko on·skangsoaha.
Iarangni bidingo Rangsakonani AITC legislator Zenith Sangma, question hour-o sing·aniko dakangahachim.
GHADC-o kam ka·giparangni man·kugijagipa dormaharangko basako on·na man·gen ine AITC legislator-ni sing·anina aganchakengon, ADC-rangna on·na bangki dongenggipa tangka paisarangni bidingo finance department-o kamrangko ka·engaha aro ru·utgijan matchotatgnok ine Dhar aganaha.
