SHILLONG: North Garo Hills a·jani Mendipathar constituency-ni ning·o dingtang dingtang PMGSY ramarangko tariani kamrang namen ka·sinahani gimin contractor-rangna on·gimin work order-ko a·dok sorkari den·galpilaha.
Bristibar salo, Mendipathar constituency-o matchotkugijagipa kamrangni gimin Mendipathar-ni AITC MLA Marathon Sangma, Assembly-ni question hour-o sing·doangon, iani bidingo sorkarioniko ma·sina gita man·aha.
Sangma-ni sing·anina aganchakaniko on·angengon, Mendipathar constituency-ni ning·o matchotkugijagipa mingdok kamrang dongkuenga ine a·dokni Deputy Chief Minister aro PWD (Roads) Minister Prestone Tynsong parakataha.
Mendipathar constituency-ni ning·o ka·enggipa kamrangni gimin janapatengon, L21-oni Galwangsa-ona km 2.012 ong·gipa ramako tariengaha, T06-oni Dangra Songma-ona km 3.036 ong·gipa ramako tarina tender-ko on·piltaina kam ka·engaha, L35-oni Chipakram-ona km 1.484 ong·gipa ramako tarina ia bilsini January jao work order-ko on·piltaiaha, T06-oni (Matchakol) Dimit A·ga-ona km 3.127 ong·gipa ramako tarina ia bilsini January jao work order-ko on·piltaiaha, T01-oni Gambil A·pal-ona km 8.214 ong·gipa ramako tarina tender on·ani kamrangko ka·engaha aro L023-Bangsi A·pal-oni Bangsu Dogru gita Cheran-oni km 2.61 ong·gipa ramako tariengaha ine Tynsong parakataha.
Contractor-rang kam ka·sinani a·selsa ia kamrangko matchotningjaha aro ia contractor-rangna on·gimin work order-rangko den·galpilaha ineba PWD (Roads) Minister parakataha.
Kamrangko somoi gita matchotatchina Mendipathar MLA, PWD Minister-ko didiangskaaha.
