SHILLONG: Meghalaya Transport Corporation (MTC) nanga gita kajinarangko man·jaengani a·sel tangka paisani gita neng·nikanirangko chagrongna nangenga aro iani a·selan kam ka·enggiparangni dormaharangkoba on·na man·jaenga ine Sukrobar salo, a·dokni Transport Minister Dasakhiat Lamare, Assembly-ni budget session-o parakataha.
Iana skang, AITC-ni MLA George Lyngdoh, a·dok sorkariko sing·doangengon, MTC-o kam ka·enggiparang, 2021 bilsini April jaoni da·ona kingkingan dormaharangko man·tokjaenga ine an·tangni suk ong·gijaniko parakataha.
Uni sing·anirangna aganchakaniko on·angengon, iani bidingo Transport department, nanga gita ja·kurangko de·enga aro ia neng·nikaniko ta·raken namatna ka·dongenga ine Transport Minister, ku·rachakaniko on·angaha.
Indake ong·engon, MTC-ni bangbang ong·e dongenggipa biaprangko parking lot dake jakkalna man·gen aro ian samba jolo garirangni apchangket ong·aniko namatasan ong·aigija kajinarangko man·na dakchakaniba ong·gen ine AITC MLA ku·pattianiko on·angskaaha.
Uni ku·pattianiko Transport Minister-ba namnikpae, iani bidingo uamang chanchianggen ine parakataha.