TURA: Meghalaya a·doko 4th teacher-ni kamko ka·enggiparangna dormaharangko bariatani bidingo a·dokni Education Minister Lahkmen Rymbui, Assembly-ni budget session-o maming ku·rachakaniko on·jahani gimin All Meghalaya 4th Teachers Association (AM4thTA) Garo Hills Unit, suk ong·gijaniko parakataha.
Association-ni president Tengsrang K Sangma-ni parakatani gitade, 4th teacher-rangni dormahako bariatna gita Education Minister an·tangan re·anggipa 2021 bilsini December jao ku·rachake, 2022 bilsini budget session-ona sengkuchina gita skigiparangko mol·molahachim indiba budget session-ni somoio ua 4th teacher-rangni dormahako bariatani bidingo mamingkon janapskajahachim.
“2021 bilsini budget session-ona Education Minister Lahkmen Rymbui an·tangan 4th teacher-rangni dabianiko niatna ku·rachake ra·ahachim indiba da·alonan sorkari, chingni dabianina nachil songjaenga. 4th teacher-rang pilakan ia bilsini budget session-na ka·dongani gnang nichaksotokahachim indiba indin ong·gramaiaha,” ine Sangma parakatenba, 4th teacher-rangni dormahako bariatna badita somoirangko nangkugen ine Education Minister-o sing·doangaha.
Assistant teacher aro 4th teacher-rangni poraiani gadang aro kamrang apsan ong·genchimoba dormaha man·anirangde apsan ong·jaenga maina 2013 bilsini April 1 tarik dipet assistant teacher-rang gong 9000/- dormahako man·ahaoba 4th teacher-rangde gong 6000/-kosan man·aiachim aro 2017 bilsini January 1 tarik dipet SSA assistant teacher sakgittamde gong 20,493/-ko man·engoba 4th teacher-rangde da·onan japrako gong 12,000/-kosan man·engkua ine AM4thTA GH unit parakatahachim.
Iani bidingo 4th teacher-rang changni chang a·dok sorkari aro a·dokni Governor-naba sedoatahachim.
