SHILLONG: Assam aro Meghalaya a·dokni simarango golmal ong·enggipa biaprangoni damdok jolrangko namatchengna gita a·dok damgnini sorkarirang, ia jani gisepon New Delhi-o bon·kamgipa changna Memorandum of Understanding (MoU)-o soi ka·grikgen ine Sombar salo, Meghalaya a·dokni Chief Minister Conrad K Sangma, Assembly-o parakataha.
“Ia jani gisepon ia MoU-ni bidingo bon·kame chanchirimenba soi ka·grikna sienga. Iani bidingo Ministry of Home Affairs (MHA) chingna March-ni 27 tarikko tik ka·e donatchengaha,” ine Assembly-ni budget session-o sing·anirangna Chief Minister aganchakaha.
Ia kamo bak ong·paenggipa Cabinet-ni pilak membor-rangan unsalo unbaksa Delhi-ona re·anggen ineba Chief Minister parakataha.
Chief Minister-ni parakatani gitade, a·dok damgnini gisepo meligrikna man·jaenggipa damdok jolrangko namatna gita ia salo songgigrikaniko dakna siengani gimin ian gisik ra·ani salba ong·gen.
“Meghalaya a·dokni bilsi 50 gapanio ia kamko chu·sokatna man·engani gimin anga namen kusi ong·a. A·dok damgnini simarango songdongenggipa manderang ru·uta bilsirangonin neng·nikanirangko man·e janggi tangtokna nangengachim indiba uamangni neng·nikaniko namatna ia sorkari kang·kare kae kam ka·enga,” ine Sangma aganaha.
