SHILLONG: Meghalaya a·dokna Inner Line Permit (ILP)-ko dabina gita a·dokni sak 60 MLA-rangko Delhi-ona rimangchina dabitokengon, a·dokni MLA-rangko Delhi-ona rimange ILP-ni bidingo ma·mong sorkari baksa agangrikna a·dok sorkari cholrangko nigen ine Sombar salo, a·dokni Chief Minister Conrad K Sangma, ku·rachakaniko on·angaha.
Assembly-ni Budget Session-o ILP-ni gimin Mawlai-ni MLA PT Sawkmie-ni sing·anina aganchakaniko on·angengon, Meghalaya a·doko ILP-ko ra·gatani bidingo Ministry of Home Affairs (MHA) nipiltaienga ine Chief Minister parakataha.
A·doko ILP-ko ra·gatchina dabienggipani bidingo a·dok sorkari, changni chang ma·mong sorkarina sedoatahachim ine janapatengon, ILP-ni bidingo a·dok sorkari, bilaken ma·mong sorkari baksa agangrikangkuna nangenga ine Chief Minister parakataha.
A·doko ILP-ko ra·gatchina dabianiko ma·mong sorkari knachakna gisik nangjaengani gimin a·dokni sak 60 MLA-rang baksa Delhi-ona re·ange a·songni Prime Minister aro Union Home Minister baksa agangrikchina dingtang dingtang dolrang, a·dokni Chief Minister-ko didiengachim ine nikna man·a.
Meghalaya a·doko ILP-ko ra·gatchina gita dabie, re·anggipa 2019 bilsini December jaon Meghalaya Legislative Assembly, dingtangmancha resolution-ko ra·manahaoba da·onan a·dokna ILP-ko on·ani bidingo ma·mong sorkari, mamingkoba agankujaengachim.
Comments are closed.