TURA: West Garo Hills a·jao niam gri ro·ong bikotaniko champengatahaoba, Phulbari jolrango dam 500-na baten niam gri ro·ong quarry-rangko chalaienga aro ia ro·ong quarry-rangoni bang·batan nangchongmotgipa lekkarang grisa chalaienga ine jolo songdongenggipa manderang matnangataha.
Jolo songdongenggipa manderangni u·iatani gitade, Chibinang-Bikonggre aro Dadenggre ramamangmangon dam 300-na bate niam gri chalaienggipa ro·ong quarry-rang donga aro ia ro·ong quarry damprakonikon salo pik up gari bolgittamrang, ro·ongrangko salangenga.
“Ia ro·ong quarry-rang bang·batan songni diltugipa biaprangosa ong·e bang·a manderangan niktokjaenga aro ia ro·ong quarry-rangko chalaina gita songni nokni nokmarangan, bading chiwale cha·giparangna on·enga. Niam gri ro·ongrangko bikotengani a·sel ia jolrango akal karap ong·nasa chinga kenchakengaha,” ine Phulbari-oni A·chik Youth Movement for Betterment of Society (AYMBS)-ni president Peter A Sangma parakataha.
Ia apsan biaprango ro·ong quarry-rangko chalaienggipa manderangan songni buring bolgrimrangko nisie galenga ineba ua parakataha.
“Ia jolrangon niam gri chalaienggipa ro·ong quarry-rang dam 500-mang ong·gen aro unbaksana Chibinang aro Phulbari-ni wilwilaoba bang·en ro·ong quarry-rangko nikna man·kugen. Ia ro·ong quarry-rang bang·batan diltugipa biaprangosa ong·a,” ine AYMBS-ni president parakataha.
Iani bidingo West Garo Hills a·jani district administration aro forest official-rango sing·sandiaton, uamang ta·raken iani bidingo am·sandie nanga gita ja·kurangko de·anggen ine ku·rachakaniko on·ataha.
Phulbari jolo dam 500-na baten niam gri chalaienggipa ro·ong quarry-rang donga
Date:
Share post:
