Ganol hydro project-ni koros tang·doani gimin inquiry-ko dakchina AITC dabia

 

SHILLONG: Ganol Small Hydro Power Project-ni koros gong kror 356-oni kror 507-ona tang·doangahani gimin name dake am·sandichina gita Budbar salo, a·dokni Opposition All India Trinamool Congress (AITC) dol dabiangaha.

Assembly-ni budget session-o ia project-ni bidingo Opposition dolni dilgipa Mukul Sangma sing·doangengon, ia project-na tangka paisarangko koros ka·anio niam gri dakaniko nikna man·engani gimin name am·sandianirangko dakna nanga ine a·dok sorkario dabiangaha.

Sangma-ni parakatani gitade, ia project-ni koros indita tang·doangahaode ia project-ni bijoli MW-prakon gong kror 22.5-mang ong·gnok aro ja·mano bijoliko ra·e jakkalenggipa manderangsa kajinarangko gamanio neng·nikanirangko man·skana nanggenchim.

“Uni gimin ia project-ni kamko ka·anio maina ong·gija dakanirang donggenchimode dos donggipa manderangni kosako nanga gita ja·kurangko de·na man·na gita inquiry-ko dakna nanga,” ine Sangma aganaha.

Iana skang, AITC-ni sakgipin MLA Zenith Sangma-ba budget session-ni jera ra·grikanio bakko ra·angengon, One Time Settlement-ni ning·o dingtang dingtang karkanarangni gro nangenggipa 30 percent-ko watahani gimin a·dok sorkariko matnangataha. Karkanarangni gro nanggipa 30 percent-ara gong kror 200-mang ong·engachim ine talataniko on·angengon, ia karkanarangna mikkang nitee grorangko watahani gimin Sangma sing·doangaha.

Get real time updates directly on your device, subscribe now.

Comments are closed.