SHILLONG: Meghalaya a·dokni Garo aro Khasi ku·sikrangkoba Indian Constitution-ni Eighth Schedule-o ra·napchina ma·mong sorkario dabie, Meghalaya Legislative Assembly-o resolution-ko ra·manahaoba da·onan ia dabianiko ma·mong sorkari knachakjaengani gimin Bristibar salo, dingtang dingtang MLA-rang iani bidingo sing·doangatokaha.
Garo aro Khasi ku·sikrangko Constitution-ni Eighth Schedule-o ra·napchina dabie, 2018 bilsion Meghalaya Legislative Assembly-o resolution-ko pass ka·manahachim ine nikna man·a.
Ia ku·sik minggniko Eighth Schedule-o ra·napkujaengani gimin West Shillong constituency-ni MLA Mohendro Rapsang, Assembly-ni budget session-o sing·doangengon, ia ku·sikrangko Constitution-ni Sixth Schedule-o recognise ka·e Autonomous District Council (ADC)-rangon official ku·sik dake jakkalna man·enga ong·ode maini gimin ia ku·sik minggniko Eighth Schedule-o ra·napna man·skajaenga ine sorkariko sing·doangaha.
Ia sing·anina aganchakaniko on·angskaengon, district council-rango ku·tangko jakkalaniara dingtang ong·a indiba ku·sikko Eighth Schedule-o ra·napanide dingtangsa ong·skaa ine a·dokni District Council Affairs Minister Lahkmen Rymbui parakataha.
“Garo aro Khasi ku·sikrangko Eighth Schedule-o ra·napchina gita Meghalaya Assembly, ma·mong sorkarina resolution-ko on·atmanaha aro da·o ma·mong sorkarini aganchakaniko sengengkua,” ine Rymbui aganaha.
Iani ja·man, Rongara-Siju-ni MLA Rakkam Sangma-ba chanchirimanio bak ra·angpaengon, Assembly-ni mitam tom·anirangkode ku·tangtangchin ong·atna nanga ine Assembly-ni Speaker-na ku·pattianiko on·angaha.
“An·ching an·tangtangni ku·sikrangko ripingna aro tang·doatna gita gipino pangchake dongaigija an·tangtangan daitoko ra·na nanga. Skulrangoba an·ching talbate u·i-ma·sie ra·na man·na gita ku·tangtangchian skie on·na nanga,” ine Sangma aganaha.
Rakkam Sangma-ni agangipa kattarangna aganchakaniko on·angskaengon, elementary skulrangode Khasi aro Garo ku·sikrangko Education department, ra·gatmanaha ine Rymbui parakataha.