TURA: Re·anggipa Budbar walo rim·gittanga man·gipa mandeko East Garo Hills a·jani police-rang, mijal Sukrobar salo Dimit Chikamagre joloniko jokatna man·aha.
Koborko on·ani gitade, Assam Krishnai-oni bilsi 57 ong·gipa me·su badinggipa Hanif Ali-ko re·anggipa March 23 tarik waljatchio, Nongchram-o Mahabel Marak minggipa mandeni noko tusiengmiting somoio ma·sina man·gijagipa manderang, re·ange ia nokoniko rim·gittangangahachim.
Ia mandeko rim·gittangani bidingo March 24 tarik attamo Rongjeng police station-o FIR ka·ani ja·man, East Garo Hills a·jani Superindent of Police (SP), dingtang dingtang biaprangoniko kobor ra·ruruenba, dolsa police-rangko sandina watataha.
Sukrobar salni 1:30 bajimango ia police-rang, Dimit Chikamagre songona napange am·sandion, ia songni diltugipa biapona rim·gittangange donako man·enggipa mandeko man·eaha.
“Sukrobar salpaksachibara 1:30 bajimango chingni sipairang, Dimit Chikamagre songona re·ange am·sandienba ia mandeko jokatna man·aha. Ia mandeko rim·gittanganggipa manderang, police-rangko niksoon diltugipa buringchi kate chaksotokaha,” ine Sukrobar salo, East Garo Hills a·jani SP Bruno A Sangma parakataha.
Rim·gittanganggipa manderangko police-rang sandina a·bachengataha ineba Sangma parakataha.
