TURA: East Garo Hills a·jani Wageasi jolo dakait dake ra·gipa mande sakbriko re·anggipa Sonibar salo, East Garo Hills a·jani police-rang rim·na man·aha.
Rim·ako man·gipa mande sakbrini bimingranga Tillingbirth M Sangma, Walak M Sangma, Tengsan R Sangma aro Chingrak M Sangma ong·achim aro uamang sakbrian Mejolgre Chekjongbra songoni ong·a ine kobor on·aha.
Dakait dakani bidingo Danal UP School-ni principal, Rongjeng police station-o FIR ka·ani ja·man dos dakgipa manderangko police-rang rim·na man·aha.
Skul principal-ni FIR-o parakani gitade, re·anggipa March-ni 24 tariko dakait dakgipa sakdok manderang, uni gariko A·brong samba jolo champengsoenba, mobile phone-rangko ra·seke ra·angahachim. Dakait dakgipa biapara North Garo Hills a·jani simao donggipa Wagesi samba jolo ong·achim.
Ia a·selni bidingo police-rang am·sandianirangko dakenba, ja·mano dakait dakgipa mande sakbrini bimingrangko man·aha aro uandaken ia mande sakbriko Mejolgre songonikon rim·na man·aha.
“March-ni 26 tarik pringo Rongmil outpost-ni police-rang, Mejolgre songona re·ange dakait dakgipa mande sakgniko rim·aha aro uamangni mobile phone-rangkoba rim·aha,” ine East Garo Hills a·jani Superintendent of Police (SP) Bruno A Sangma parakataha.
Iani bidingo ning·tue am·sandianirangko dakengkua ineba SP parakataha.
