Rongjeng Model College-ni bidingo bakan inquiry-ko a·bachengatgen ine sorkari ku·chaka

TURA: Rongjeng Model College-ko rikanirang namja ine matnangenba, iani bidingo inquiry-ko dakningjaengani gimin jolni dingtang dingtang NGO-rang, jingjengatanirangko dakengon, ia college-ko rikani bidingo bakan inquiry ba am·sandianiko a·bachengatgnok ine Mongolbar salo, East Garo Hills district administration-ni pal Rongjeng-ni block development officer (BDO) ku·rachakaniko on·angenba, jingjengataniko dontongchina NGO-rangko mol·molangaha.
Rongjeng Model College-ko Detailed Project Report (DPR) gita rikjaenga aro college-ko rikanirang namsrangjaenga ine matnangenba, Rongjeng jolni GSU, FKJGP, GSMC aro AYWO dolrang, ia college-ko rikani bidingo inquiry-ko a·bachengkujaengani gimin Mongolbar saloni a·bachenge Rongjeng C&RD Block office-ko kam ka·na on·gija jingjengatengachim.
Iani bidingo Mongolbar salo Rongjeng-ni BDO, jingjengatenggipa NGO-rangko gronge, inquiry-ko bakan a·bachengatgnok ine jingjengataniko dontongchina NGO-rangko didiangon, NGO-rangna see on·anichi ku·rachakaniko on·skachina dabiangtokaha.
Ia Model College-ko RUSA-ni ning·o gong kror 12-na batgipa korosrangchi rikengachim.
Ia college-ko rikanirang namjani gimin NGO-rang, inquiry-ko dakchina dabie, jingjengatanirangko dakna a·bachengatahaon, iani bidingo inquiry-ko dakna gita jasa skangan technical committee-ko State Education & Literacy-ni Director songe on·angahachim indiba da·onan inquiry-ko a·bachengatkujaengani gimin NGO-rang, Mongolbar saloni a·bachenge Rongjeng C&RD Block office-ko salgnina office picketing ka·skaengahachim.
“Da·al salni bako Rongjeng-ni BDO, chingko grongenba, iani bidingo inquiry-ko a·bachengna gita bakan technical committee sokbagnok ine chingna ku·rachakaniko on·ahachim indiba technical committee-ko jasa skangan songahaoba da·onan inquiry-ko a·bachengkujaengani gimin chingna seachi ku·rachakaniko on·china chinga dabiskaaha,” ine GSU Rongjeng unit-ni president Rattu Sangma parakataha.