WILLIAMNAGAR: East Garo Hills a·jani ning·o donggipa Rongjeng Model College-ko rikanirang namja ine matnangenba, inquiry dakchina dabie Rongjeng jolo donggipa dingtang dingtang NGO-rang jingjengatanirangko dakengon, iani bidingo inquiry-ko ta·raken a·bachengatgnok ine district administration aro a·dok sorkarini ku·rachakahaniko man·ahani gimin NGO-rangni jingjengataniko dontongatchengpilaha.
Rongjeng Model College-ko Detailed Project Report (DPR) gita rikjaenga aro college-ko rikanirang namsrangjaenga ine matnangenba, Rongjeng jolni GSU, FKJGP, GSMC aro AYWO dolrang, ia college-ko rikani bidingo inquiry-ko a·bachengkujaengani gimin re·anggipa Mongolbar saloni a·bachenge Rongjeng C&RD Block office-ko kam ka·na on·gija jingjengatengachim.
Iani bidingo Mongolbar salo Rongjeng-ni BDO, jingjengatenggipa NGO-rangko gronge, inquiry-ko bakan a·bachengatgnok ine jingjengataniko dontongchina NGO-rangko didiangon, NGO-rangna see on·anichi ku·rachakaniko on·skachina dabiangtokahachim.
Indake ong·engon, Rongjeng Model College-ko rikani bidingo inquiry dakna sorkarini songe on·gipa technical committee, April 4 aro April 14 tarikni gisepon Rongjeng-ona re·bae kamrangko a·bachenggnok ine district administration-ni official-rang ku·rachakaniko on·angani ja·man NGO-rangni jingjengataniko dontongatpilaha ine u·iataha.
“Rongjeng Model College-ko rikani bidingo inquiry-ko dakna sienggipa technical committee bakan sokbae kamrangko a·bachenggnok ine chingna ku·rachakaniko on·ahani giminsa chinga jingjengataniko dontongchengenga indiba inquiry-ko dakanio kamrang ka·sinenga ine nikgenchimode chinga bilakbate jingjengatanirangko dakanggen,” ine GSU Rongjeng unit-ni president Rattu Sangma parakataha.