TURA: Adita salrangna skang, South Garo Hills a·jani Chokpot jolo donggipa Silkigre Ampangdamgre songo an·tangni bilsi 3 ong·gipa demechikko so·ote galani ja·man katchipe dongenggipa mandeko police-rang rim·na man·aha.
Re·anggipa March jani 17 tariko, Silkigre Ampangdamgre songni Lindrit N Sangma minggipa mande saksa, bilsi 3 ong·gipa Chidimit Ch Sangma-ko gitok rageke so·otahachim aro demechikgipako so·otani ja·man noktangoni katchipe dongengachim.
Jolo songdongenggipa manderangni kobor on·ani gitade, ia mandeara gisikni gita tik ong·jachim.
Ia mande, an·tangni demechikgipako so·otani ja·man noktangoni kate dongengachim aro uandaken police-rang, baditaba salrangna uko sandiani ja·man bon·kame Sukrobar salo, Betagre minggipa songni samba jolo donggipa Angke Chiring buringoniko rim·na man·aha.
Iani bidingo u·iataniko on·angengon, “Ampangdamgre aro samba jolrango songdongenggipa manderangni dakchakanichi ia mandeko Sukrobar salni 3:00 bajimango Angke Chiring buringoniko police-rang rim·na man·aha,” ine South Garo Hills a·jani Superintendent of Police (SP) Rituraj Ravi parakataha.
Dos dakgipa mandeko sal 16-na sandianio pilak nanga dakchakanirangko on·ahani gimin ua Silkigre jolo donggipa dingtang dingtang songni nokmarang aro songni manderangkoba mittelpilataha.
