TURA: Tura-ni Dakkopgre-o rikdapenggipa gong kror 128-ni PA Sangma Integrated Sports Complex-ko re·baenggipa June aro July jani gisepon matchotgnok ine Sombar salo, a·dokni Chief Minister Conrad K Sangma, SMELC building-o Skill Park aro Youth Centre baksana Track-Field Stadium-na pangchakaniko songe on·angani somoio jinmana parakataha.
Ia pangchakaniko songe on·angani somoio ua, dingtangmancha dingtang dingtang skulrango poraienggipa chatro chatrirangna M-Tab-rangko suale on·angjolaha aro a·dok sorkarini ra·gatgipa FOCUS program-ni ning·o Tura jillani ning·o donggipa dol 50 producer group (PG)-rangnaba gimik gong lak 28-ni cheque-rangko suale on·angjolaha.
Tura-o Skill Park aro Youth Centre-ko rikna gita sorkari, gong kror 24 tangkarangko chame donenga aro Track-Field Stadium-naba gong lak 16 tangkarangko chame donataha.
Ia tom·bimonganiko ong·atanio a·dokni Chief Minister, jinmana aganprakengon, Tura jillara Garo Hills gimiko mongsongbatgipa biap ong·engani gimin ia jillako tang·doatna gita sorkari, dingtang dingtang project-rangko ra·gate kamko ka·enga ine parakangaha.
“Tura jillao indita bilsirangna maming namdapatanirang dongjahani a·sel pilakni gitan tang·doaniko nikna man·jaengachim indiba da·o chingni sorkari, jillani rama jal·langrangko taridapna, dingtang dingtang nokrangko rike on·na aro jillako nitobatatna kamrangko ka·engahani gimin ka·sinsin Tura jillani tang·dobaaniko nikna man·engaha,” ine Sangma aganaha.
COVID-19-ni a·sel namroro silroroaniko ra·baanio sorkari, dingtang dingtang ra·bianirangko chagrongna nangahachim ine janapatengon, ia bilsignini gisepo dingtang dingtang neng·nikanirangko chagrongna nangahaoba uni sorkari, kamrangko dontonggija ka·aha aro dingtanganiko ra·bana man·aha ine Chief Minister parakataha.
PA Sangma Integrated Sports Complex-ko da·o June aro July jani gisepon matchotna ka·dongengaha ine janapatengon, ia sports complex-o nambatsranggipa football stadium ba robol kal·chakanikoba tariengahani gimin ia sports complex-ko matchotahaode Indian Super League gita dakgipa kal·susaanirangkoba ong·atna man·gnok ine Chief Minister parakataha.
Kror 128-ni PA Sangma Integrated Sports Complex-ko June-July jani gisepo matchotgen: CM
Date:
Share post:
