SHILLONG: Champengatako man·gipa Hynniewtrep National Liberation Council (HNLC) bobil dolko tom·tomaona rimbapilna kamrangko a·bachengatengahaon, an·tangtangko bobil dake chakatgipa gital dol ine a·kangenggipa ‘Lawei ba Phyrnai’ dol, Meghalaya a·dokni Chief Minister Conrad K Sangma-na email gita chittiko sedoatenba, HNLC bobil dolni gitcham dilgipa Julius K Dorphang-ko pattokoniko watchina dabiataha aro ia dabianiko chu·sokatjagenchimode LP skul nok te·sako boma gopretgen ine ka·mikkenataniko on·ataha.
Ia chittiko ‘Lawei ba Phyrnai’ dolni publicity secretary email ka·ataha aro ia email-ko dingtang dingtang media company-rangnaba watataha.
Ia chittiko seatgipa mandeni parakatani gitade, iana skang ua skigipani kamko ka·gipa ong·achim indiba uni kamko sorkari bon·atahachim.
HNLC-ni gitcham dilgipa Dorphang-ko, 2017 bilsio me·chik bi·sako drae til·ekani gimin bilsi 25-na pattoko donengachim indiba ia chittio uko pattoniko watpilenba, April-ni 9 tarik walni 10:00 bajio, Shillong songjinmani ISBT-o donggipa bus gario donbachina gita dabiataha.
Ia gital bobil dolo M.Tech pass ka·gipa chatrosa kamni gimin ma·sigipa software engineer ong·e, organising secretary-ni kamko ka·enga aro ia pilakan sorkarini a·selan ong·a ineba chittio sorkariko matnangataha.
Ia apsan dolan, re·anggipa April-ni 1 tarikoba CM, Governor aro adita police officer-rangna email gita chittiko sedoatahachim aro ia gital bobil dolko sak 37 kamgri ong·e dongenggipa skia man·gimin chadamberang bikotaha ine chittio parakatahachim. 2022 bilsini May 1 tarik dipet anti changantian bomarangko gopretgen ineba ua chittio ia dol, ka·mikkenataniko on·angahachim.
“Chinga skanggipa MBOSE building-ko, uni ja·man angni pass ka·bagipa St Anthony’s School aro College-ko boma gopretchenggen. Meghalaya a·dokni chadambe pilaknan janggi tangani cholrangko on·na gita cholrangko sandikujaskal chinga uni ja·man NEHU aro dingtang dingtang biaprangko boma gopretgen,” ine ia dol, email-o parakatahachim.
HNLC bobil dolko ‘chongipa’ dolsan ong·aia ine janapatengon, ‘Lawei ba Phyrnai’ dolni manderangkode sorkari, bamatanio rimbana man·jawa ine email-o parakataha.
“Chingko sandianio na·simangni gamchatgipa somoiko bon·atnabeha aro bomako sandina a·bachengatboha,” ineba ia dolni dilgiparang, email-o parakataha.
Ia email-ni copy-rangko a·dokni Governor Satya Pal Malik, Meghalaya High Court-ni Chief Justice Sanjib Banerjee, Labour Minister Sanbor Shullai, Principal Secretary GHP Raju aro gipin sakdok dilgiparangnaba watataha.