SHILLONG: Public-Private-Partnership (PPP) mode-o Shillong Medical College-ko Kali Pradip Chaudhuri (KPC) Group baksa chalaina songgigrikaniko da·o Meghalaya sorkari, chu·gimik den·galatpilaha.
Iani bidingo kobor ra·timgiparangna talataniko on·angengon, ia company, songgigrikaniko taridapchina aganengani gimin ia songgrikaniko den·galpilna gita High Power Committee-ni tom·anio tik ka·aha ine Health department-ni Principal Secretary Sampath Kumar parakataha.
“Da·o chinga sorkari baksa nangrime chalaina sikenggipa company-rangko okamna gital dake Expression of Interest (EOI)-ko ta·raken on·taignok,” ine Kumar aganaha.
Shillong Medical College-ko PPP mode-o chalaina gita 2011-12 bilsirangon a·dok sorkari, KPC group baksa songgigrikaniko dakmanahachim aro ia medical college-na pangchakaniko Jhalupara-o donggipa Reid Chest (TB) Hospital-o songe on·angahachim ine nikna man·a.
Ia medical college-ko TB Hospital-o chalaina pilak kamrangko matchotani ja·man a·dok sorkari, ia college-ko New Shillong Township-o donggipa Umsawli-ona apjitbaskana 2018 bilsio tik ka·skaahachim.
Indake ong·engon, a·dokni medical college-rangko PPP mode-o kulina gita a·dok sorkari, gital NITI Aayog aro Department of Economic Affairs (DEA)-ni scheme-rangkoba salna nangnikenga ine Kumar parakataha.
Meghalaya a·doko songdongenggipa manderangna an·seng baljokanirangko on·na man·na gita a·doko medical college-rangko kulina man·ama man·jawa, cholrangko nichina gita re·anggipa bilsio Meghalaya High Court-ni division bench, a·dok sorkariko didiangahachim.
Meghalaya a·dokko man·aoni da·o bilsi 50 gapani ja·manoba a·doko medical college damsaba dongkujaengachim ine nikna man·a.
Shillong medical college-ni rikna gita da·onaba kamrangko a·bachengatna man·kujaengon, Tura Medical college-kode rikna a·bachengengahachim indiba ia college-ko rikanioba dingtang dingtang neng·nikanirangko chagrongna nangengani a·sel da·onan kamrangko matchotatna man·kujaengachim.