SHILLONG: Meghalaya a·dokni Chief Minister Conrad K Sangma aro gipin sorkari official-rangna ka·mikkenatani kattarangko see email ka·atani gimin police-rang, an·tangtangko ‘Lawei ba Phyrnai’ ine minggipa bobil dolni mande sakgniko Budbar salo rim·na man·aha.
Ia mande sakgniko rim·e sing·sandiani ja·man saksakode police-rang watpilaha indiba saksakode rim·aha.
Police-rangni u·iatani gitade, rim·ako man·gipa mandean ia bobil dolko bikotdilgipa ong·achim.
Ia mamlao gipin manderang jak dongama dongja uko ma·sina gita police-rang am·sandianirangko dakenga ineba police official parakataha.
Rim·ako man·gipa mandean, an·tangtangko kamgri ong·e dongenggipa chadamberang ine a·kangenba, baditaba chang Chief Minister aro gipin sorkari official-rangna, ka·mikkenatani kattarangko see email ka·atahachim aro me·chik bi·sako drae til·ekanina pattoko donako man·enggipa HNLC bobil dolni gitcham dilgipa Julius K Dorphang-koba watpilchina dabiatahachim. Dorphang-ko pattokoniko watpiljagenchimode LP skul nok te·sako boma gopretgen ineba ia dol, ka·mikkenataniko on·angahachim.
Ia apsan email-kon ia dol, dingtang dingtang media-rangnaba watpripraatahachim.