TURA: Bilsi 50-na Assam aro Meghalaya a·dokni simarango ong·enggipa golmalrangko namatna ja·ku de·anio Meghalaya a·dokni mitam songrangkoba Assam-o napatna gita dolgni sorkarirangni songgigrikaniko dakahani gimin Garo Hills-ni dingtang dingtang dolrang, Meghalaya sorkariko jegaltokengon, iandake a·doktangni A·chik songrangko Assam-o napatengani gimin All Garo Hills Federation Multipurpose Cooperative Society (AGHFMCS)-ba a·dokni Chief Minister-ko jegalataha.
Sorkarini segatani gitade, Assam aro Meghalaya a·dokni simarango meligrikna man·jaenggipa biaprang gimik dam 12 jolrang gnangchim aro ia jolrango ong·enggipa golmalrangko namatna kam ka·anio a·dok damgnini sorkarirang, skanggipa bako damdok jolrangko namatchengna ja·kurangko de·chakatahachim. Indake ong·engon, ia damdok jolrangko namatna kam ka·anio Meghalaya a·dokni mitam songrangkoba Assam-o man·angskaengachim aro iana batanggimin sal somoirangonin Opposition dolrang aro dingtang dingtang NGO-rang, a·dok sorkarini kosako raken jegalanirangko daktokengachim.
Iani bidingo AGHFMCS-ni gitaba, Meghalaya sorkari aro a·dokni Chief Minister-ni kamko jegalatengon, a·songni niam bidikon, Sixth Schedule a·jarangkode Tribal-rangnasa pakwatman·aha aro ia a·jarangkode a·dok sorkarirang maming dakeba a·kangna aro pale cha·na niam dongja ine parakataha.
“Ia a·arangara Sixth Schedule a·jao ga·akgipa biaprangsa ong·ani gimin A·chikrangni niamo chatchi maharirangni ning·o donggipa a·arangsa ong·a aro ia a·arangko sorkari maming dakeba skatang gipinna on·na ba palna gita niam dongja. Indide mai bilo pangchake ia songrangko Meghalaya sorkari aro a·dokni Chief Minister, Assam a·dokni ning·o napatna tik ka·aha?” ine AGHFMCS-ni dilgiparang sing·doataha.
