TURA: Assam aro Meghalaya a·dokni simarango ong·enggipa golmalrangko namatna kam ka·anio Meghalaya a·dokni mitam songrangko Assam-o napatna gita a·dok damgnini MoU-o soi ka·grikaniko Garoland State Movement Committee (GSMC)-ba raken jegalataha aro ia jolrango songdongenggipa manderangni namgnina ia MoU-ko ta·raken den·galpilchina dabiangaha.
GSMC Pedaldoba regional unit-ni chairman Rimjen Ch Sangma-ni u·iatani gitade, Meghalaya a·dokni mitam songrangko Assam-o napatenga ine matnanganirangko man·ahani gimin GSMC-ni dilgiparang, Siminaguri aro Malchapara songrangona re·ange, songni manderango sing·sandieon, a·dok damgnini gisepo sualgrikgipa square kilometre 36,72 a·arang pilakan Meghalaya a·dok ning·on ong·achim ine ma·sina man·aha.
“Chinga ia songrangona re·ange songni manderang baksa agangrikan baksana biaprangko nieon, ia pilak biaprangan Meghalaya a·dok ning·o man·gipa biaprangsa ong·achim ine ma·sina man·aha indiba iako Assam aro Meghalaya sorkari bak dake da·o Meghalaya a·doknade km 18-mangni gitasan donrike MoU-o soi ka·aha. Iako chinga raken jegalenga maina 1972 bilsio Meghalaya a·dokko Assam-oniko ma·ekate on·ani somoion ia pilak biaprangko Meghalaya a·doknan pakwatmanahachim,” ine GSMC-ni dilgiparang parakataha.
Assam-o napatenggipa songrangni skulrang, police outpost-rang aro dingtang dingtang department-rangko Meghalaya sorkarisa chalaiengachim ine janapatengon, maikai indide ia biaprangko Assam-na pakwate on·na man·aha ine GSMC sing·doangaha.