Chenggapara-o awareness program-ko ong·ata

TURA: Samtangtango donggipa buring bolgrim, chiring chibisik aro uandakgipa ong·telaigiparangko ripinge rakkina gita West Garo Hills a·jani Gambegre Block-ni ning·o donggipa Chenggapara songo, Pringnam Sports & Cultural Club-ni gita awareness program-ko ong·atangaha.
Ia program-ko club-ni general secretary Bostone M Sangma dilangaha aro ia program-ko ong·atanio dingtang dingtang skulni sak 100-na baten chatro chatrirang bakko ra·angtokaha.
Ia awareness program-ko ong·atanio dingtang dingtang dilgiparang aganprakengon, samtangtango donggipa buring bolgrimrangko, chiring chibisikrangko aro pilak janggi gnanggipa do·o matrangkoba ripinge rakkichina gita didianiko on·angaha.