TURA: Chatro chatrirangna somoiko on·chenggija Common University Entrance Test (CUET)-ko ra·gatkujachina gita A·chik Holistic Awakening Movement (AHAM), North Eastern Hill University (NEHU)-ko didiataha.
University Grants Commission (UGC)-ni ge·etanio pangchake North Eastern Hill University (NEHU)-ni gitaba university-ni ning·o donggipa dingtang dingtang college-rango under graduate course-rangna ia 2022-23 bilsionin Common University Entrance Test (CUET) 2022-ko a·bachengatna tik ka·ahachim.
Indake ong·engon, da·o dipet ia CUET-ko under graduate aro post graduate course-rangna ra·gatkujachina gita AHAM didiatenba, bilsignina Covid-19-ni a·sel chatro chatrirang neng·nikanirangko chagrongna nangtokahani gimin ia CUET-ko ra·gatna skang adita somoirangko chatro chatrirangna on·kuchina gita didiataha.
“Meghalaya a·doko aro mongsongbate Garo Hills-ode chatro chatrirang indinan namgipa lekka poraniko ra·na man·tokpajaengani gimin ia porikkako ra·aniara chatro chatrirangko salrikdapani gitaba ong·gen. Uni gimin da·o dipet ia porikkako ra·kujachina chinga NEHU-ni dilgiparangko didina ska,” ine AHAM-ni president George Prince Momin parakataha.
Iani bidingo AHAM-ni dilgiparang, a·dokni Chief Minister, Education Minister aro NEHU-ni Vice Chancellor-ko gronge agangrikegen ineba Momin parakataha.
Indake ong·engon, dingtang dingtang university aro college-rango UG aro PG course-rangko dakna sikenggipa chatro chatrirangna dakchake on·na gita AHAM-ni unit-rangko information centre dakskana tik ka·aha ineba AHAM-ni president parakataha.
CUET-ni bidingo AHAM-ni gita Garo Hills-ni dingtang dingtang a·jarango awareness program-ko ong·atanggen ineba Momin parakataha.
