SHILLONG: Meghalaya a·doko niam gri koela bikotani aro koela salruraanirang dongja ine a·kangengani gimin All India Trinamool Congress (AITC)-ni dilgipa Dr Mukul Sangma, NPP-chi dilenggipa Meghalaya Democratic Alliance (MDA) sorkariko matnangataha.
Sangma-ni parakatani gitade, a·doko niam gri dakanirangko nikna man·engoba ia sorkari, pangnan ku·rachakgija jegalrongaiachim.
“A·doko niam gri kam ka·enga ine basako uamangni aganako nikna man·gen? Basakoba ia sorkarini ku·rachake agananiko nikna man·ahama? Uamang pangnan iandakgipa kamrangko jegalrongaia,” ine Sangma aganaha.
Meghalaya a·doko niam gri koela badinganirangko a·dokni chief minister, deputy chief minister aro home minister an·tangtangan jegalrongenga ine janapatengon, a·doko ong·enggipa obostarangko a·dokni manderangan da·o ma·sitokengaha ine AITC-ni dilgipa parakataha.
“A·doko niam gri koelarangko bikote salruraengoba sorkari an·tangan jegalenga ong·ode, iani bidingo jakgitele am·sandiatanirangko dakchina dabiana agrede chingo maming gipin chol dongjaha,” ine Sangma aganaha.
Niam gri koela bikotaniko champengna gita Supreme Court aro National Green Tribunal (NGT)-ni ge·etanirangko nirokna Gauhati High Court-ni gitcham Justice BP Katakey-ko songna tik ka·ahani gimin Meghalaya High Court-ko mittelpilangengon, a·dok sorkari kakketkon aganengachim ine da·ode niam gri koela bikotanina MDA sorkariko matnangenggipa manderang ma·sina man·gnok ine adita salrangna skangsan, a·dokni Deputy Chief Minister Prestone Tynsong aganahachim.
Meghalaya a·doko niam gri koelarangko bikotenga ine matnanganirangkoba ua jegalattaiahachim.
