MPPC-ni chief, Vicent H. Pala 2023 election-o susaaniko daknaba donga

SHILLONG: Party-ni bang·a gitcham dilgiparang party-oni ong·katokahani gimin 2023-o ong·nasienggipa election-o an·tangni susana miksonganiko, MPCC-ni chief, Vincent H. Pala, Sombar salni bako aganangaha.
”Chingni party-ni bang·a gitcham dilgiparang party-oni ong·kate kata baksana da·o dongkuenggipa mittam dilgiparangba ong·katna miksongtokengani gimin anga an·tangan election-o susana gita nanggenkon. Uni gimin chinga party-ni gadangko nambatatna gita chingo donga pilak gamjinrangko name jakkalna gita nanggen,” ine Pala kobor ra·timgiparangna aganangaha.
Election-o susana gita kragipa candidate-ko man·jaode, angko susaaniko dakchinaba, Sutnga-Saipung Block Congress Committee mol·mole agananiko dakangaha ine ua parakataha.
”BCC-ni tom·aniko May 3 tariko dakanggen, haida ia tom·anion angni election-o susaaniko tik ka·e ra·angnaba donga,” ine MPCC chief agangangaha.
Delhi-ni dilgiparang baksaba election-o susaani gimin anga agangrikaniko dakman·aha ineba ua aganangaha.
”Indake angni susaaniko, party-ni dalbatgipa dilgiparang tik ka·e ra·aniko dakanggen,” ine Pala aganangaha.
Unbaksana, Block Congress Committee (BCC) aro District Congress Committee (DCC) election-o susanagipa candidate-rangni bimungrangko, September-ode minge ra·bachina tik ka·e donman·aha ine, MPCC chief aganangaha.
Uni aganani gitade, Congress election-o susana gita ge 40 constituency-on candidate-rangko nike donman·aha.
”Mittam constituency-rangode chinga candidate-rangko nie ra·aniko dakkuenga,” ine Pala aganangaha.
Uni aganani gitade, 90 percent candidate-rangde uamangni election-o susaaniko masiaha baksana nangchongmota kamrangkode ka·aba ka·sotokengaha
Indiba, uni aganani gitade gipin party-rang politics kal·e golmal ka·aniko dakjana gita, uamang candidate-rangni bimungrangko somoi ong·na gitikosa parakataniko dakgen.
Unbaksana uni aganani gitade, bang·a sorkarini gitcham official-rangba party-o napna gita voluntary retirement-ko ra·tokengaha aro gipin party-ni dilgiparangba party-o napna gita miksonge dongtokenga.
”Chingni chanchiani gitade bang·a dilgiparang, September aro October jani gisepo party-o napnaba donga,” ine ua aganangkuaha.