Anna Yojana, Public distribution program-ko Tura FCI-o ong·ata

TURA: “Azadi Ka Amrit Mahotsav Campaign” -ko maniani bak gita, Food Corporation of India (FCI), Nazing Bazaar, Tura, Garo Hills district-o Pradhan Mantri Gareeb Kalyan Anna Yojana (PMGKAY)-ko ra·gatanio chu·sokaniko manina programme-ko Nazing Bazaar-o donggipa Food Storage Depot-o ong·ataha.
Indake programme-o bakko ra·e aganprakaton, West Garo Hills-ni Deputy Commissioner Ram Singh, a·songo covid sajinma sokchengani somoio sabisiko champengna lockdown-ko ra·gatani salrango jolni manderang baditan neng·nikarangko chagrongna gita nangahachim, iarangni gimin gisik ra·ataha aro ua somoio maidake PMGKAY, bilongen dakchakbegipa ong·aha iani gimin aganataha.
PMGKAY-ni gita cholgri nokdangrangna India sorkari, indin damgri merongrangko suale on·aha, ia scheme-oniko manderang bang·en namgniko man·aha. A·gilsako dal·batgipa programme-ko parakatani a·sel a·songni gimik bakrango donggipa manderang pandemic-ni somoio namen dakchakbeaniko man·aha. Darangba okria-cha·asiako chagrongna gita nangjaha, ineba DC Ram Singh aganaha.
Indake ong·engon DC Ram Singh, sorkarini gimik machinery-rang jekai-wholesaler aro Fair Price Shop dealer-rangkoba neng·nikan somoio kamtangko kimkim ong·e ka·anina mittelataha.
Uandake tom·anio Baghmara Food Civil Supplies & Consumer Affairs Department-ni Sub-Inspector S N Sangma-ba ‘Azadi Ka Amrit Mahotsav’ aro PMGKAY-ni gimin agantalate on·angaha.
Program-ni somoio, Food Corporation of India-ni bidingo tarigipa kan·dikgipa jawilwatkoba mesokataha.