SHILLONG: Jensalo a·dok aro a·songko rikna nanga unon chadamberangni bak ra·aniko nanga, ian mongsonggipa ong·a ine National People’s Party (NPP)-ni National President Conrad K. Sangma mijal Butbar salo aganaha.
Mijal Butbar salo Meghalaya-ni skotong Shillong songjinmani U Soso Tham Auditorium-o National People’s Youth Front (NPYF)-ni ong·atgipa youth convention-o ua aganaha. Ua tom·ao a·dokni dingtang dingtang biaprangoni chadamberang bakko ra·angaha.
Political party-o chadambe sakatini bakko ra·ani namen dal·begipa ong·asan ong·aija indiba dal·begipa nisan aro songsalna dangdike on·ani ong·a, ua aganaha.
Purno Agitok Sangma sagini u·ianiko jinmao janape, ‘‘Sakantian miksongani aro namgnina kamko ka·na nanga. An·ching niksamsoani dongna nanga aro nisanko chu·sokatna kamko ka·na nanga. Chadambe ong·e an·ching jebasi kamko ka·na man·jawa indiba an·chingni nisanrangko chu·sokatna krengna chanchina nanga,” NPP dilgipa aganaha.
Party-nasan kamko ka·aigija songsalna aro a·songko rikanio kamko ka·na miksongani aro chakchikani gnang sakantini chanchiani baksa kamko ka·china ua chadamberangko didiaha. “A·dokna aro a·songko rikna dangdike on·a dal·begipa nisanna an·ching ku·cholsan kamko ka·na nanga,” ua agandapaha.
Assam-Meghalaya sima-arini bidingo NPP manderangko cha·bokaha ine opposition-ni matnangani bidingo ‘‘Chinga a·dokni manderangko cha·bokode manderang uamangni party-ko wate chingni party-o napna nangjachim, uamang (opposition) an·tangtangkon sing·e nichengbo aro nibo uamangko maiko dakenga ba dakaha,’’ NPP dilgipa sing·doa gnang aganaha.
Assam-Meghalaya sima-arini mamla altua ong·ja, ‘‘Ian namen rakbegipa chanchiani ong·a indiba chingni ka·rimskarang baksa chanchie chinga chanchianiko dakenga aro sima-ari mamlako namatna re·mikkangenga.”
“Da·alo an·chingko maiko daka uko mikkangchi pangnan aganjringa’’ jawilwat mingsani kattako janape, manderang an·chingko dal·e ra·enga unigiminsa an·ching sikkimana bate uamangni janggi tanganirango dingtanganiko ra·bana basena nangenga,” NPP dilgipa Conrad Sangma aganaha.
Assam-Meghalaya sima-ari mamlani bidingo manderang bang·en agan-jikjakenga, ian ra·biani ong·chongmota indiba chinga re·mikkangenga. ‘‘A·dokni manderang bilsi 50 bilsirangna sengaha…ian altubegipa chanchiani ong·ja indiba chinga jeko dakaha uan a·dokni manderangni namgnina dakenga,” ua aganaha.
Mukul Sangma-ni somaio 2011 bilsio songrangni list-rangko tariaha aro je songrangko watchanggalaha uan chingni sorkarini kam ong·ja indiba uni kamsa. ‘‘Ua da·o wenanggija 2011 bilsio ua ua songrangona wenangna nangachim aro obostako nie political kal·na cholko ra·na jotton ka·enga. 2011 bilsio ua songrangona na·a wenangode ua songrang watchanggalako man·jawachim,’’ ua agandapaha.
Assam baksa chanchigrikna ian sorkarina neng·beani ong·a maina meligrikgijagipa a·jolni bimingrangko a·dok sorkari on·manaha, ua talataha.
KHADC-ni kachariona re·angna chanchiako janape, ‘‘Niamo pangchake ua mamlako kachariona ra·anggen ine mitam manderang aganenga. Anga uamangna agana ska NPP MDC-rang ua chanchianio bak dongja. Anga uamangna u·iatna ska uamang ua chanchiao namen bak donga aro da·o maina uamang politics kal·na jotton ka·enga, NPP Chief Conrad K. Sangma aganaha.
Conrad K Sangma South Tura seat-o man·jawaha ine AITC dilgipani agangipa kattani gimin, “Election altua ong·ja. Na·aba chegen ine da·a chanchiabo. Anga election-o sirikgnok ine da·o mitam manderang aganenga, Anga rake kam ka·gipa ong·a,” ua aganaha.
