M’laya-o CUET-ko ra·gatna bilsi 2 somoiko bi·dapchina DYC-ni president didia

 

TURA: University Grants Commission (UGC)-ni ge·etaniko man·e Meghalaya a·dokoba undergraduate course-rangna North Eastern Hill University (NEHU)-ni ning·o donggipa pilak college-rangon Common University Entrance Test (CUET) porikkako ia bilsionin a·bachengatna siengahani a·sel college-rango admission ra·na nangenggipa chatro chatrirang neng·nikanirangko chagrongna nangtokengani gimin Meghalaya a·doknade CUET-ko a·bachengatna skang komibeoba bilsigni somoiko bi·dapchina gita North Garo Hills District Youth Congress (DYC)-ni president, Meghalaya sorkariko didiataha.

North Garo Hills DYC-ni president aro IIT Guwahati-oni pass ka·gipa Timjim K Momin-ni parakatani gitade, salgro salaram a·dokrangara lekka porani gadango a·songni gipin bakrangna bate ja·manchakenggipa a·dokrang ong·a aro da·o tanggitik college-rango admission ra·na gita CUET porikkako seataniara salgro salaram a·dokni chatro chatrirangnade namen kragijani ong·engachim.

“Anga an·tangan IIT Guwahati-o poraibagipa chatro ong·e salgro salaram a·dokni chatro chatrirangara, central India-ni chatro chatrirang baksa porikkarangko sesusaanio aro lekka poranio apsan gadango ong·na man·ja ine namen ma·sia. Central entrance porikkarangko sena gita chatro chatrirang komibeoba bilsignimangde tarisamsona gita somoiko nangronga, indide da·o tanggitik college-rango admission ra·na gita CUET porikkako ong·atgenchimode maikai chatro chatrirang, chu·sokgipa ong·e admission-ko ra·pana man·gen,” ine Momin sing·doataha.

Meghalaya a·dokni aro mongsongbate Garo Hills-ni chatro chatrirangde central-ni porikkarangko seanio bang·batan chu·sokna gita man·rongpaja indide maikai chatro chatrirang da·o tanggitik ia porikkako sena man·gen ineba DYC-ni president sing·doataha.

“Meghalaya a·doko 90 percent undergraduate college-rangan NEHU-ni ning·o chalaienggipa college-rangsa ong·a aro da·o dipet a·doktangni university-rang dongkujani gimin CUET porikkako a·bachengatna skang komibeoba bilsigni somoiko bi·dapna nangchongmota,” ineba Momin, a·dok sorkariko didiangaha.

Get real time updates directly on your device, subscribe now.

Comments are closed.