SHILLONG: Meghalaya a·dokko Common University Entrance Test (CUET)-oniko watani bidingo da·o dipet ma·mong sorkarioni u·iataniko man·soa dongkuja indiba bakan u·iataniko man·sona ka·dongenga ine Budbar salo, a·dokni Education Minister Lahkmen Rymbui parakataha.
Gipin a·dokrango chubata gadangrango poraina sikenggipa chatro chatrirangkode ia CUET-na register ka·angkuchina gitaba ua didiataha.
NEHU-o bak ong·enggipa private aro sorkarini dakchakaniko man·enggipa college-rangde ia CUET porikkako sena nangjawa indiba North Eastern Hill University (NEHU)-o aro NEHU-ni Shillong aro Tura campus-ni ning·o donggipa college-rangde ia CUET porikkako sena nanggen ine a·dokni Chief Minister Conrad Sangma parakatahachim.
“Meghalaya a·dokko CUET-oniko watani bidingo da·o dipet chinga see u·iataniko man·soa dongkuja indiba Delhi-o an·chingni Chief Minister Conrad Sangma baksa tom·e agangrikani somoion CUET-oniko watna gita Union Education Minister Dharmendra Pradhan ku·rachakaniko on·atmanaha,” ine Rymbui, kobor ra·timgiparangna parakataha.
Indake ong·engon, iandakgipa porikkarangko seaniara chatro chatrirangni chubata gadangrango poraianirangna dakchakani ong·gen ine Education Minister, a·dokni chatro chatrirangko, ia CUET-na register ka·e donangaikuchina didiataha.
Register ka·mangimin chatro chatrirangni tangka paisarangko on·pilgenma ine sing·on, da·o dipet iani bidingo ua mamingoba aganna man·kujawa indiba register ka·gimin chatro chatrirangde CUET porikkako serikna man·o nambata maina ian mikkangchi uamangna namgni ong·gen ine Rymbui parakataha.
Meghalaya a·doko CUET centre-rangko kulina aro Garo Hills-o NEET centre-rangko kulina a·dok sorkari krenge kamko ka·enga ineba Education Minister parakataha.