TURA: Re·anggipa Mongolbar pringo, South Garo Hills a·jani Baghmara-chipakna re·angenggipa gari bolsa North Garo Hills a·jani Rari songo a·sel ong·aha aro ia a·sel ong·anio bilsi 20 ong·gipa me·chik saksa siangna gita nangaha.
Koborko on·ani gitade, Mongolbar pringwalo, South Garo Hills police-rangni jakkalenggipa Bolero gari bolsa, Shillong-oni re·bapilengachim indiba Mongolbar pringwalni 3:00 bajimango ia gari, Rari kosakko re·baengmitingo ramaoni tang·srotange a·kuangchina ga·akonangaha.
Ia gario mande sakbri songrebaengachim aro ia gari a·kuangchi ga·akonange a·sel ong·anio, East Garo Hills a·jao donggipa Rongsak Rengregre songni Chimison Ch Sangma minggipa mandeni bilsi 20 ong·gipa demechik Chisil M Sangma siangna gita nangaha.
Kobor on·timgiparangni u·iatani gitade, a·sel ong·anio sianggipa me·chik, an·tangni nokdangni manderangko grongna gitasa Shillong-oni ia gario re·baengachim.
Gari a·sel ong·anio gariko saltimgipaba bilongen saknaanirangko man·aha aro gipin sakgni manderangba bang·gija saknaanirangko man·aha ine kobor on·aha.