TURA: Assam a·dokni ning·o donggipa Damra-oni North Garo Hills a·jani Bajengdoba-ona dakanggipa ramako sal 10-ni gisepon matchotatchina gita Garo Students Union (GSU) Northern Zone dabiangaha.
GSU Northern Zone-ni parakatani gitade, ia ramako tarina gita 2020 bilsion sorkari, Badri Rai & Company-na pakwate on·ahachim aro ia ramako 2021 bilsini a·bachengonin tarina a·bachengatahaoba da·onan kamrangko chu·gimik matchotkujaengachim.
Iani bidingo GSU Northern Zone-ni gita Budbar salo, North Garo Hills a·jani Deputy Commissioner-na memorandum-ko on·angenba, ia ramako ta·raken matchotatchina dabiangaha.
“Ia ramako 2021 bilsini a·bachengaonin tariengahaoba da·onan maming kamrangko nikna man·kujaenga aro ia ramani badiaba badiaba bakrangosan a·a cho·anirangko nikna man·engkua. Ia ramako matchotgija donengani a·selan Resubelpara, Mendipathar aro ia rama jol gimiko donggipa manderangan neng·nikanirangko chagrongna nangtokenga. Iani bidingo chinga changni chang PWD-na sedoatani ja·manoba maming kamrangko nikna man·jaengani giminsa da·alo chinga ia kamko sal 10-ni gisepon matchotatchina dabienga,” ine GSU Northern Zone parakataha.
Ia ramako ta·rake matchotatjagenchimode wachi sokbahaode ramako re·ruraenggipa manderang neng·nikanirangko man·batna nanggnok ineba GSU NZ parakataha.
Ia ramako tarienggipa contractor-ni kosako rakgipa ja·kurangko de·china didiatengon, sal 10-ni gisepo ia ramako matchotate on·jagenchimode jingjengatanirangko dakna a·bachengatgnok ine GSU Northern Zone parakataha.