TURA: Phulbari police station-ni ning·o donggipa Chibinang jolni Aminur Islam minggipa mande saksa, re·anggipa April 30 tarikoni gimaenga ine kobor on·aha.
Koborko on·ani gitade ia mande, April-ni 30 tarik pring 9:30 bajimango, hajira kam ka·ani tangkarangko ra·na gita Amongra songchipakna re·angahachim.
Iani bidingo ia mandeni jonggipa police-rangna missing report-ko May 3 tariko on·eaha aro uni missing report-o parakani gitade, uni adatang Aminur Islam, Tikrikilla Samsan-o Khairul Islam minggipa mandeni ning·o head mistri ong·e kamko ka·engachim.
“Ua kam ka·ani tangkarangko ra·na re·angaonin da·onan re·bapilkujaenga. Chinga uko ‘Eid’-na skangan sokbagen ine ka·dongengachim indiba ua gimachipaha aro uni mobile phone-ba switch off ong·aha,” ine ia mandeni jonggipa FIR-o parakatenba, ia mandeko ta·raken sandie on·china gita police-rangko mol·molataha.
Ia mandeni tangka ra·na re·anggipa biapara, West Garo Hills a·jani Phulbari police station ning·o ga·akskaachim.
